CM-in dan dik lo a family pension la mek-te ngaihhnathiamna hun hawn chhunga anmahni duh thu ngeia bansan turin a ngen
Vawiin July ni 15, 2026(Nilaini) khan Finance Department chuan dan dik lo va Family Pension laten an Pension Payment Order sorkara pe kir tura hmalakna bultanna Statewide Kick-off Programme on 'Sensitization of Voluntary Surrender of Pension Payment Order (PPO)', Assembly Annex Conference Hall-ah an buatsaih a. Chief Minister Lalduhoma, Finance Minister ni bawk chuan a hmanpuiin, Mizoram sorkar hnuaia document dik lo hmanga Family Pension la mek zawng zawngte chu ngaihhnathiamna hun hawn chhunga anmahni duh thu ngeia bansan (surrender) turin a ngen.
Chief Minister chuan, kan pensioner-te hi kan duhsak a, an pension benefit te, family pension te hi tha tak leh tluang takin la se kan duh. Pension first formulation pawh kan chingfel hnem tawh a ni. Pension tihfel mai thei loh tam takte hi an thawhna office lama an pension file khawihtuten training an neih that tawk loh vang a ni fo tih kan hriat avangin, chung mite zirtirtu tur Training Wing siam tumin hma kan la mek a, an vanglai hun zawng zawng sorkar tana hmang raltute hi kan zah a ni, a ti bawk.
CM chuan hetianga kan pensioner-te kan duhsak em em lai hian Family Pension hi mi eng emaw zatin dik lo takin an la nia hriat a ni a. A then hi chuan tum reng vangin document lem hmangin an la nia an lan laiin, mi tam tak hi chuan an hriat loh vangin an lo la an ni thei bawk a. Hetianga dik lo taka sorkar sum luan raltirna hi tihtawp kan tum a ni, a ti a. A bultan nan mahni duhthu ngeia PPO pekkirna hun, thla thum chhung kan hawng mek a, document dik lo, dawt behchhana family pension laten anmahni duh thu ngeiin bansan (surrender) se kan duh a. He hun hawn chhunga pe kirte chu an sum lo lak tawhte kan chhuh dawn lo va, kan ngaidam dawn a ni, a ti bawk.
.
