FCS&CA Minister hovin Rod size tlinglo hralh chungchang sawi ho. Mipui te Rod man tlawm ringawt um lo a, size dik leina chang hre turin an duh
Vawin July ni 14, 2026 khan FCS&CA Minister B.Lalchhanzova pisa-ah Mizorama rod size tlinglo zawrh thin tihtawp dan tur chungchang mi pawimawh ten an rel.
Minister chuan, Mizoram hmun tam takah iron rod te chu danin a bituk aia tê hralh a awm nia thu dawn bawhzuia sawihona chu koh a nih thu sawiin, lirnghing nasatna laia awm kan nih avangin in sak nana rod kan hman te chu a len zawng, a rih zawng leh a chak lamah te mi thiamten a nih tur ang an duan chu a tling pha ngei ngei tur a ni, a ti a. Rod size tlinglo hman hian insak chakna chu nasa takin a tihniam thin a, hei hi a him lo takzet a ni, a ti.
Meeting ah hian FCS&CA, Legal Metrology, PWD Quality Control Division, Mizoram Civil Engineers’ Association, Mizoram Consumers’ Union bakah All Mizoram Cements & Iron Rod Dealers’ Association te an tel a. Department leh pawl hrang hrang meeting-a tel te hian rod size tlinglo Mizorama a lo luh tan dan te leh a do let dan tur kawng hrang hrang te an sawi ho a ni.
MCEA leh PWD lam ten rod size tlinglo hman a hlauhawm dan te report pe in Minister chuan heng te hi mipuiah a tam thei ang ber puan zara, mipui te pawhin an rod leiah fimkhur se a duh thu a sawi a ni.
Meeting chuan hmalak dan tur kawng hrang hrang awm thei te sawi hovin mipui him nan chak zawka hmalak an rel a. Iron Rod zuartu company te hnenah Rod Size dik chauh Mizorama rawn la lut tura hriattirna leh vaukhanna ziaka pek ni se, an ti a. BIS te nena thawhhona tih chak ni se, Mizorama Rod Size diklo zuarte leh chutiang ti tura hma la tute zawng chhuak tura chak taka hmalak ni se tiin an rel.
Hriattirna tihchhuah a nih hnu pawha ti lui te chu Rod zuar an ni emaw, Rod company an ni emaw, an chungah hremna lek ngei ni se, tiin meeting chuan a rel a. Mipui te pawhin Rod man tlawm ringawt um loin, Rod Size dik leina chang hria se tiin hmalakna tur ruahmanna an siam a ni.
